それを取りなさい

Svefnlausir dagar framundan.

Bragi — 2008-04-08T09:37:38+00:00

Kristjana byrjar að vinna núna í vikunni. Nánar tiltekið þann tíunda. Ég hlakka ekki mikið til þar sem skiptingin á milli okkar hefur verið sú að ég fæ að sofa til a.m.k. sjö hálf átta á morgnana áður en ég mæti til vinnu. Nú er sá draumur úti.

Annars er það af okkur að frétta að leigjandinn okkar er farinn til Venesúela og nýr leigjandi er á leiðinni. Ég hef góða tilfinningu fyrir því að fá nýtt blóð í húsið.

Þorri fór í tíu mánaða skoðun í dag og mældist tíu og hálft kíló og sjötíu og sjö og hálfur sentimetri.

Ég þurfti að útskýra fyrir hópi unglinga hvað þetta senti og milli þýddi í lengdareiningum. Fyrir ykkur sem ekki vita það þá merkir sent eða cent, hundrað og milli eða mille þúsund. Útleggst þá sentimetri sem einn hundraðasti úr metra og millimetri sem einn þúsundasti úr metra. Þetta eins og margt annað úr okkar menningu er upprunnið úr latínu. Munið það einfaldlega næst þegar þið sjáið ártal í lok sjónvarpsþátta. MCM stendur þá fyrir þúsund og hundrað dregið af þúsundi sem verður þá 1900.

Þetta segir sig kannski sjálft en alltaf er gott að skerpa á þekkingunni. Ef ég fer rangt með þá biðst ég afsökunar og vona að viðkomandi besservisser athugasemdist.

Vestfjarðaferð

Bragi — 2008-04-01T15:17:49+00:00

Þorri Bragason kíkti heim úr tíu daga leiðangri til vestfjarða þar sem hann stóð í ströngu við snjóþoturallý og almennan krúttskap á meðan foreldrar hans stóðu í ströngu. Annað þeirra eyddi óhóflegum tíma á Ísafirði við fundahöld á meðan hitt var innilokað í snjóskafli sem umlykur bústaðinn okkar þessa stundina.

Við lentum í ýmsu yfir páskana. Hæst ber að nefna þegar við urðum vitni að dýfingum með frjálsri aðferð hjá fjórum hraustum ungmennum á Ford pick-up ofan í pollinn á Ísafirði. Sem betur fer komust allir upp úr lauginni lifandi en ansi margir brostu út í annað þegar bíllinn var á endanum dreginn upp úr og nokkrar bjórdósir hrundu úr bílnum. Veit ekki hvað...

Það var ansi mikið af skemmtilegu fólki fyrir vestan og helst ber að nefna hressa bandið Hraun! sem bar af í glæsileik. Við kíktum á tónleika með strákunum í Edinborg á Skírdag. Nokkuð hresst.

Bessa frænka kom með frábæra hugmynd um hvað mætti gera til að hressa upp á atvinnulífið á Flateyri. Henda bara íbúunum í burtu og gera þorpið að einu kvikmyndaveri. Hlýtur að vera markaður fyrir þetta. Skilur alla vegana ekki eftir sig olíubrák á stærð við Texas...

Útsýnið var fullkomið í tvo daga. Það var skafrenningur hina dagana.

Heimferðin var svo löng og leiðinleg. Skafrenningur frá Ísafirði og niður Hrútafjörð. Ófært yfir Hestkleif þannig að við þurftum að fara Reykjanesið hvers vegir voru hrikalega slæmir. 7 1/2 tími í heimferð án teljanlegra stoppa.

Hægt er að sjá myndir hér.

Stend mig vel

Bragi — 2008-03-11T17:48:57+00:00

Ég er að standa mig vel í þeirri viðleitni að breyta um lífsstíl og grennast í leiðinni. Ég hóf þetta púl mitt fyrir tíu dögum og hef misst 3-4 kíló síðan þá. Ég býst nú reyndar við að mikið af þeim kílóum sé vökvatap þar sem ég fæ mun minna salt úr matnum í dag en ég gerði fyrir átak. Hreyfing hefur verið mikil og góð og áfengisbindindið er ekki að valda mér neinum vandræðum. Það er helst að þörfin eftir góðri súkkulaðiköku og mjólkurglasi standi mér fyrir þrifum. Nú er ég sem sagt kominn í 85 kíló og hana nú! Stefni á það að komast undir 80 í lok maí.

Helvítis heilsuræktarátak

Bragi — 2008-03-04T10:49:43+00:00

Nú verður tekið á! Ég lofaði sjálfum mér á laugardaginn síðasta að fyrir þrítugsafmælið myndi ég koma mér í gott form. Semsagt, vigtin á að fara undir áttatíu kíló. einfalt og eðlilegt markmið. Nema hvað, þetta er talsvert verðugt markmið þar sem ég er í dag rétt um 88 kíló. Þetta er þvísemnæst kíló á viku. Hvernig ég ætla að fara að því er einfalt.

Ekkert áfengi.
Ekkert gos.
Engar kartöflur.
Ekkert pasta eða núðlur.
Ekkert brauð eða það minnsta sem ég kemst upp með.
Engin hrísgrjón.
Enginn sykur.
Engar fitandi sósur.
Ekkert rautt kjöt nema á laugardögum.
Hreyfing í það minnsta fimm sinnum í viku.

Djöfull er maður klikkaður.

Hvers á ég að gjalda!

Bragi — 2008-02-24T19:23:27+00:00

Helvítis Eurovision er enn einu sinni á afmælisdaginn minn. 23. maí. Ég verð þrítugur í vor og neyðist greinilega til að halda enn eitt Eurovision partýið. Ég ætla samt að gera þetta stærra en nokkurn tíma fyrr. Leigja sal og vera með freyðandi veigar. Spurning um hvaða staður er nógu stór fyrir þrítugsafmæliseurovsionpartýBraga?

Einu sinni var

Bragi — 2008-02-18T22:56:04+00:00

Ég var að enda við að sjá auglýsingu í Sjónvarpinu að þættirnir Einu sinni var verða eindursýndir á laugardagsmorgnum klukkan 10. Ég er það mikið barn inní mér að ég gladdist heilmikið við þessar fréttir. Þetta eru að mínu mati bestu baranaþættir sem gerðir hafa verið og vona ég að Sjónvarpið muni líka sýna þættina um líkamann og Il Etait Une Fois... L'espace eftir sömu höfunda.

Smellið á franska heitið til að fara aftur í tímann og upplifa nostalgíuna.

Mæting á fyrsta blaðamannafund Nýs Meiriháttarhluta

Bragi — 2008-02-14T16:40:38+00:00

Ég vil byrja á því að þakka fyrir hræðilega mætingu á blaðamannafund sem ég hélt þann 12 þessa mánaðar. Á fundinn mætti ég sjálfur og kanínan Snorri.
Einnig flaug starrahópur yfir fundarstæðið þegar ég hafði lokið við að útlista lausnir mínar varðandi Vatnsmýrina. Einnig skilaði ég af mér greinargerð þar sem lið fyrir lið var útskýrt hvernig losna mætti við róna í miðbænum. Í meginatriðum felst lausnin í því að skófla þeim öllum inn í langferðabíl og losa út á Garðatorgi. Kominn er tími til að önnur sveitarfélög en Reykjavík greiði fyrir þann kostnað sem af þessari óværu hlýst og ég legg til að Garðabær verði fyrstur til að taka við keflinu.

Mér hefur klæjað síðan starrahópurinn flökti en ég mun áfram standa keikur og berjast fyrir bættum réttindum innhringjara á Útvarpi Sögu.

Mér leiðist.

Blaðamannafundur á morgun!

Bragi — 2008-02-11T19:33:25+00:00

Ég hef ákveðið að boða til blaðamannafundar á morgun þar sem ég mun ræða ákveðin mál sem hafa verið í umræðunni nýlega og tengjast REI málinu og borgarstjórn. Allar líkur eru á því að fundurinn verði haldinn í Perlunni en það ætti ekki að koma neinum á óvart ef ég ákveð með skömmum fyrirvara að færa fundinn yfir á umferðarmiðstöðina ef mig mun hungra í litla snæðing. Einnig ættu ljósvakamiðlar þeir sem munu senda beint frá blaðamannafundinum að hafa varann á þar sem ég hef ekki gert það upp við mi hvort að þeir fái óheftan aðgang að fundinum. Einnig eru rauðhærðir óvelkomnir.

Takk fyrir
GG Bragi

Fatakaup annarra en Björns Inga

Bragi — 2008-01-23T10:24:54+00:00

Hefur einhver spurt annan stjórnmálamann en Björn Inga um fatakaup nýlega? Mér finnst það mál vera út í hött og sýna best hversu fáránleg umræðan um stjórnmálin eru orðin. Í fyrsta lagi kemur þetta almennum kjósendum engan veginn við. Þetta er innanhúsmál í Framsókn. Í öðru lagi er mín skoðun á þessu sú að þetta sé fullkomlega eðlilegt ef framkvæmdastjóri og kosningastjóri taka ákvörðunina um fatakaupin. Þeir bera þá ábyrgðina en ekki sá sem fötin ber. Einng þarf að líta á hver tilgangur fatakaupanna er á hverjum tíma. Kannski fannst kosningastjóra Framsóknarmanna Björn Ingi líta út eins og jólasveinn í þeim fötum sem prýddu fataskápinn hans. Þar af leiðandi tekur hann þá ákvörðun að eitthvað þurfi að gera til að flíka upp á pilt og sendir hann í Boss og Herragarðinn í uppflíkun. Hann þyrfti samt að losa sig við baugana.

Fulltrúi engra borgarstjóri Reykjavíkur!

Bragi — 2008-01-21T19:09:17+00:00

Maður sem er fulltrúi engra kjósenda í Reykjavík er orðinn borgarstjóri í Reykjavík. Þetta er svartur dagur í sögu Reykjavíkur.

Þýðir þetta samt ekki að Ólafur má ekki fá kvef þá er meirhlutinn fallinn?

Af bakstungum og annarri vitleysu

Bragi — 2008-01-21T18:47:14+00:00

Ég er Reykvíkingur og er í dag bálreiður. Þessi andskotans vitleysa með borgarstjórn fer meira en lítið í taugarnar á mér. Að mínu mati er komin upp sú staða að þarna er komin upp staða þar sem traust borgarbúa á fulltrúa í borgarstjórn er ekkert. Ég treysti ekki Ólafi F, Birni Inga, Gísla Marteini, Villa, Þorbjörgu Helgu og félögum. Ég er meira að segja byrjaður að efast um getu Vinstri Grænna og félaga minna í Samfylkingu. Aðalmálið er nú samt ruglið í smáflokkunum og Sjálfstæðisflokki.

Mikið hefur verið talað um hnífa í baki manna. Flugvöllurinn fer ekkert þrátt fyrir vilja borgarbúa og þetta pakk fær sínu framgengt. Við nýja borgarstjórn hef ég bara eitt að segja, ég treysti ykkur ekki og vil ekki samþykkja svona hrossakaup fyrir skattpeningana mína.

2+1 eða 2+2

Bragi — 2008-01-10T09:50:00+00:00

Pólitíkin er skrýtin skepna. Nú er hægt að fylgjast með umræðu um hvort eigi að fara 2+1 leið eða 2+2 þegar kemur að því að breikka Suðurlandsveg.

Mér hefur fundist mjög skrítið að fylgjast með málatilbúnaði þeirra sem vilja sjá 2+2 leiðina farna. Þar er farin þrjóskuleiðin og týnd til handahófskennd rök sem annaðhvort eru ágiskanir eða rangar viðmiðanir. Dæmi um ranga viðmiðun er til dæmis sú að menn bera saman
Suðurlandsveg um Hellisheiði saman við Reykjanesbrautina og halda því í alvörunni fram að hægt sé að sjá árangurinn af þeirri síðarnefndu sem vísbendingu um hvað tvöföldun geti gert fyrir Suðurlandsveg. Þetta er rangt. Hæðarmunurinn einn gerir út um þennan samanburð enda vita menn sem keyra Hellisheiðina að vetri til að heiðin getur orðið ansi snjóþung og veðurfar uppi á heiðinni er engan veginn samanburðarhæft við það sem gerist við Vatnsleysuströnd og vestar á Reykjanesi. Ástæðan fyrir því að ég lít á snjóinn í þessu tilviki er sú að áhrifaríkasta snjómoksturstækið er akstur bíla um veg. Ef snjór er mikill og vegurinn er tvöfaldur þá segja sérfræðingar það einfaldlega að umferðin sé ekki nóg til að hreinsa veginn vel og hann verði í raun hættulegri. Þetta sé ekki raunin með 2+1 veg þar sem aukaakreinin er til framúraksturs og líklegt að ökumenn hagi akstrinum þannig að tekið sé tillit til aðstæðna.

Þrjóskurökin er líka hættuleg en á annan hátt. Þegar vegur er tvöfaldaður þá kostar það mun meiri pening og tíma en ef vegur er gerður að 2+1 vegi. Þetta sjáum við á Reykjanesbrautinni og þetta munum við sjá enn skýrar þegar fjallvegurinn á Hellisheiði er byggður. Suðurlandsvegurinn er ekki eini vegurinn sem þarf að byggja hratt upp núna þar sem Vesturlandsvegurinn er ekki langt frá því að þurfa breikkun og Sundabrautin er orðin forgangsatriði. Ef þrjóskast er við að gera Suðurlandsveginn að 2+2 vegi þá mun annað af tvennu gerast. Verktíminn mun lengjast gríðarlega og óvíst hvort af opnun verði á næsta áratug, eða þá að önnur samgönguverkefni munu þurfa að sitja á hakanum vegna heimtufrekju manna um 2+2 veg.

Forsendurnar fyrir bættum samöngum út frá höfuðborgarsvæðinu um Suðurlandsveg eru þessar: Umferð hefur aukist til muna um Suðurlandsveginn. Svo mikið að vegurinn annar ekki aukinni umferð á föstudagseftirmiðdögum og seinnipart sunnudags á ákveðnum árstímum og þar myndast bílaraðir sem þó eru ekki stopp en fara mjög hægt. Til að greiða fyrir þessari umferð þurfa að koma til vegabætur. Umferðarslys eru einnig tíð á þessari leið og þarf að finna leið til að fækka þeim. Það sama má segja um vesturlandsveginn. Í mínum huga er þessir tveir vegir ekki sitthvort málið heldur hluti af sama kerfinu. Sama vandanum. Menn og konur sem enga sérfræðiþekkingu hafa á vegamálum aðra en þá að hafa keyrt um á bílnum sínum koma fram í þessu og benda á tvöföldun og standa fast við þá hugmynd þrátt fyrir að flestir helstu sérfræðingar þjóðarinnar, bæði hjá vegagerðinni og öðrum skipulagsstofnunum mæli frekar með 2+1 leiðinni. Bæði með öryggissjónarmið og kostnaðarsjónarmið(sem hefur bein áhrif á verktíma) í huga. Mér hefur virst sem að sumir hafi einnig dottið í þá gryfjuna að lýsa því yfir að Sunnlendingar eigi eitthvað skilið að þeirra vegaframkvæmdir séu mikilvægari og nauðsynlegri en annarra. Þetta er náttúrulega vitleysa, Ég geri mér fullvel grein fyrir því að þörfin er til staðar en að mínu viti skipta mig mannslíf meira máli en korter. Jafnvel þótt að um sé að ræða ansi fjölmennt korter.Því vil ég sjá 2+1 leið farna á bæði Suðurlandsvegi jafnt og Vesturlandsvegi.

Annars er ég með lausn að öllum þessum vanda. Það ætti náttúrulega að banna umferð bila með skuldahala(fellihýsi, tjaldvagna og hjólhýsa) og húsbíla á annatíma. Þannig drögum við bæði úr umferð og dreifum henni á skynsamlegan máta.

Kominn frá Brasilíu

Bragi — 2008-01-08T15:03:40+00:00

Við erum nýkomin frá Brasilíu. Þar komst ég að nokkrum hlutum.

Íslendingar eru hófsamir neytendur miðað við klikkaða liðið í Brasilíu. Þar kaupa menn sér tannbursta og stuttermaboli á raðgreiðslum. Þetta olli því að við misskildum ansi oft verðmiða á vörum þarna og héldum fyrst um sinn að við værum í einhverri verðparadís. Þegar komið er svo að kassanum þá kemst maður að því að verðið á skónum sem við vildum var víst bara afborgunin og verðið var ein af fimm greiðslum.

Capirinha er góður drykkur og á ég núna eina Cachaca flösku sem fer í kokkteilagerð bráðlega.

Arkefly er ömurlegt flugfélag. TUI líka.

Icelandair rúla.

888 á hollensku er eins og að segja achthundert-aktu-taktu.

Brasilíubúar eru yndislegt fólk sem brosir allan hringinn. Ég man ekki eftir að hafa hitt neinn mann sem ekki tók á móti okkur með brosi eða uppreiddum þumli.

All-inclusive Hótel eru málið. Þvílíkt þægilegt að þurfa ekki að hugsa um að vera að greiða fyrir allt.

Í Brasilíu er flottasta ströndin... þangað til annað kemur í ljós.

Þeir hafa líka örlítinn áhuga á boltaleikjum. Merkilegt samt hvað ég var alveg laus við að hitta Ronaldinho. Var hann ekki látinn vita að ég væri í heimsókn!

Nudd er nauðsyn.

Menningarsjokkið var mest þegar Þorri fékk hita og okkur var uppálagt að baða hann í köldu og vera sem mest með hann úti. Ha! Hefur þetta fólk aldrei verið veikt! Ef maður er veikur þá á maður að vera inni undir sæng og dúðaður í ullarpeysu og leista.

Iss þú ert bara sófakommi og hippi úr 101!

Bragi — 2008-01-07T10:16:57+00:00

Þetta er yndislega viðmótið sem hann Dofri Hermannsson fær frá Ragnari Jörundssyni sem segir orðrétt í grein sinni; ,,Um olíuhreinsistöð, leit huldufólks að peningum" sem birtist þann 27.12.2007 á fréttavef http://bb.is

Við munum berjast fyrir því olíuhreinsistöð rísi á Vestfjörðum, alveg sama hvort skriffinnar í 101 Reykjavík eins og Dofri eru því andvígir. Enda hafa þeir ekki áhyggjur af fólksflótta, en eins og kom fram í skýrslu um samfélagsáhrif sem gerð var fyrir Fjórðungssambandið í tengslum við fyrirhugaða olíuhreinsistöð, þá verða flestir fluttir frá Vestfjörðum eftir 50 ár ef ekkert verður gert.

Dofri talar digurbarkalega um að hann sé umhverfissinni. Það er gott að vera umhverfis- og náttúruverndarsinnaður. Við eigum að nýta landið okkar í sátt við umhverfið og náttúruna. En öfgar, offors og skilningsleysi eins og koma fram í skrifum Dofra, geta aldrei átt rétt á sér.

Ragnar Jörundsson bæjarstjóri Vesturbyggðar. Frjálslyndur jafnaðarmaður, umhverfis- og náttúruverndarsinni.

Það er ekki efnið sem fjallað er um sem ég ýfist í, það er hvernig stimpillinn 101 og umhverfissinni er notaður. Ragnar Jörundsson telur sjálfan sig vera umhverfis- og náttúruverndarsinna en gengisfellir orðin með því að lítillækka skoðanir annars manns sem telur sig einnig bera hag náttúrunnar fyrir brjósti. Einnig telur hann það vera nauðsynlegt að staðsetja Dofra í póstnúmer 101 ,,þar sem eingöngu vont fólk býr í 101 Reykjavík." Var þessi kvikmynd virkilega svona vond? Ég bara spyr.

Pældíðí

Fimmti stormurinn og ekkert fokið enn

Bragi — 2007-12-18T13:11:18+00:00

Er ég að telja rétt? Var þetta ekki fimmti "stormurinn" á einni viku í gær? Ég tók inn garðhúsgögnin fyrir föstudaginn þar sem sá átti að vera stærstur. Það var líklegast rétt hjá mér að gera en ekkert fauk af því sem eftir lá í garðinum.

Ólína Þorvarðadóttir(ég vísa ekki á moggablogg) kvabbar eitthvað yfir ritdómi föður míns á heimasíðunni sinni þann 28.11.2007. Þar kallar hún pabba minn karlrembusvín óbeint með því að halda því fram að hann telji að margra barna mæður eigi ekki að vera að sýsla og basla við að gefa út ljlóðabækur. Þessar ásakanir Ólínu urðu til þess að ég renndi yfir bókina Vestanvindar og verð ég eiginlega að segja að hún má prísa sig sæla yfir því að pabbi minn, en ekki ég, skrifaði þennan dóm.

Kurteisari mann og siðlegri er erfitt að finna en föður minn. Ég hefði aldrei látið verðskulduð gífuryrðin liggja ósnert, er kannski öfgafyllri í tjáningu minna meininga. Bókin er sneysafull af líkingum sem eru í hróplegri mótsögn við sjálfa sig, þar sem ekki er hægt að grípa til þess vopns að kalla slíkt skáldaleyfi. Ólína birtir dæmi um ljóð úr bókinni og leyfi ég mér að vísa í það hér:

Í hafdjúpum hugans

leitar vitundin landa

um útsæ og innhöf

ferðast hún um þangskóg

í sjávardölum

úr logndýpi drauma

sækir hún í strauminn

streitist á móti

brýst um

og byltist

í þungu róti

Á grunnsævi vökunnar

spriklar hún að kveldi

- þar lagði dagurinn netin

að morgni

þéttriðin net

troðfull að kveldi ...

Fær Ólína fyrir þetta kvæði lofkór moggabloggsins til að mæra sig og þar, á þeim vettvangi, er upphefð hennar mikil. Ég fæ ekki skilið þörfina til að verja sig eftir bókadóm sem í rauninni var ekki það harður. Ég myndi segja að pabbi hafi verið að gefa bókinni tvær stjörnur af fimm, líklegast fær Ólína meira að segja heila stjörnu fyrir að búa fyrir vestan. Aldrei lýsir faðir minn því yfir í dómnum að konur eigi ekki að skrifa eða að gefa út bækur. Slíkt er langt frá því vera hans skoðun. Ég sé líka móður mína í anda bregðast við slíku frá kallinum. Pönnur og pottar hola haus.

Staðreyndin er sú að eftir liggur að Ólína skrifaði kléna ljóðabók sem verðskuldaði ekki góðan dóm. Að persónugera fagmannlegan dóm um ljóðabók og það að láta gamminn geysa um persónu þess sem dóminn skrifar er hvorki fagmannlegt né líklegt til vinsælda.

p.s. Ég vil bæta því við að ég er ekki menntaður bókmenntafræðingur og hef ekki unnið við bókmenntagagnrýni. Hins vegar er ég víðlesin og sæmilega skýr í kollinum og tel mig geta dæmt um hvort að ein skitin ljóðabók sé verðug þess pappírs sem hún er prentuð á.